Donald o arabela dipotso tsa barati ba hae ho marangrang
Sebini le mongodi wa dipina wa Afrika Borwa, Donald, o ile a iphumana a le tlasa kgatello mecheng ya litaba tsa sechaba kamora ho kenya video a tantsha ka koloing ya hae. Video eo e ile ya tsosa maikutlo a fapaneng, ba bang ba mo nyefola, ha ba bang ba bontsha tlhokomelo ka bophelo ba hae.
Posong eo a neng a e ngotse ka mantswe a reng, “Ke ne ke batla feela ho re HEY,” barati ba hae ba ile ba tlatsa karolo ya ditlhaloso ka melaetsa ya tshehetso. Ho arabela matshwenyeho ao, Donald o ile a ngola a re: “Batho ba heso, le se ke la tshwenyeha ka nna. Ke qaleho ya mosebetsi wa ka feela moo ke neng ke se ke nyefolwa mecheng ya litaba tsa sechaba. Ke monna ya hlohonolofaditsweng, mme ke se ke amohetse seo.”
Ho ya ka ditlhaloso tse hlahang khafetsa diposong tsa hae, ba bang ba ntse ba mo soma ka mmele wa hae o mosesaane, ba bile ba bolela hore mohlomong oa kula. Tlas’a e nngwe ya divideo tsa hae, ho bile le tlhaloso e ileng ya ata haholo e reng, “Fola kapele,” e leng se ileng sa tsosa ngangisano e matla.
Ka nako e le nngwe, Donald o ntse a phahamisa pina ya hae e ntjha e bitswang Hey, eo ho bolelwang hore e tla lokollwa haufinyane. Pina eo e bua ka monna ya ratang motho, a mo bolella hore ha a batle ho mo sitisa merero, empa o ne a mpa a batla ho mo dumedisa feela ka “hey.”
Tlhaloso eo e ileng ya ata e se e fetohile metlae ya ka hare pakeng tsa Donald le barati ba hae, haholoholo kamora tshebetso ya pina le podcaster Sfiso. A boela a arolelana sekotwana sa tshebetso seo ka mantswe a metlae a reng, “Vicky, o entseng?” e leng se ileng sa eketsa thahasello pina eo.
