Polelo ya Inkabi ka Lwah e baka kgalefo e matla

Inkabi Records e iphumane e le ka tlasa kgatello e matla ya setjhaba ka mora ho lokolla polelo e buang ka boemo ba bophelo ba sebini sa yona, Lwah Ndlunkulu. Sena se tla ka mora ditlaleho tse reng sebini se ile sa iswa sepetlele ka lebaka la mathata a bophelo bo botle.

Polelong eo, khamphani e hanne ka tieo ditletlebo tsa hore ke yona e bakileng boemo boo. E itse: “Re batla ho hlakisa ka ho toba hore Inkabi Records ha e amane le mathata a jwale a bophelo ba Lwah.” E boetse ya re kutlwisiso ya yona, e tswang dipuisanong le Lwah le ba lelapa la hae, e supa hore bothata bo amana le maemo a botho, ho kenyeletswa le dipelaelo tsa tshebediso ya dintho tse lematsang.

Inkabi Records e ile ya ama hape menyenyetsi e mabapi le konteraka le ditjhelete tsa sebini sena. Ho ya ka polelo ya yona, dikamano tsohle tsa mosebetsi le Lwah di tsamaisitswe ka toka, mme di latela dipehelo tsa konteraka. E boetse ya re e ke ke ya fana ka dintlha tse ding ka kalafo kapa bophelo ba Lwah ntle le tumello ya lelapa.

Leha ho le jwalo, batho ba bangata mecheng ya puisano ba ile ba nyatsa mokgwa oo polelo e entsweng ka wona. Mosebedisi Guguletho o itse polelo eo “ha e na kutlwelobohloko, e bile e potlakile ka tsela e sa lokang,” athe Mthombeni yena o ile a re ho bua ka tshebediso ya dintho tse lematsang ho “mo lahlela ka pela bese.”

X le Instagram le tsona di ile tsa tlala maikutlo a matla. Mosebedisi UNCLE CHARLES o qositse khamphani ka hore e leka ho nyenyefatsa Lwah, athe JuddeRo a re ketsahalo ena e tiisa hore Mduduzi Ncube o ne a nepile ha a tloha k’hamphaning eo. Ketsahalo ena e tsositse potso e kgolo mabapi le meedi ya lekunutu la bataki.

BALA: Miss SA 2026 e fetola papadi: meputso e metjha e bulela basadi menyetla e meholo